‘Oh kiek, die hadden we vroeger thuus ok!’ Dat is meschien wel de meest geheurde uutsproak ien et ‘ Blik Trommel en Oudheden Museum’ ien Nijziel. Duzenden blikken veurwaarpen, mor ok hiel veul andere curiosa is verzoameld ien e veurmoalege dörpswinkel, Hoofstraat 39 ien Nijziel. De winkeliers Hein en Tineke Nauta hemmen ien e loop van e joaren blikken en trommels opdoan uut hiel Nederland. Ze kinnen et ok niet loaten om andere mooie verzoamelingen uut te stallen. Zolang der mor plak is ien e herberg!
Hein en Tineke sloten ien 2006, noa 31 joar trouwe dienst, de leste krudenierswinkel van Nijziel. Hein zien gezondheid werd minder en ok werd de winkel minder rendabel. Ien e olle winkel hadden ze al veul trommels en blikken op et hoogste schap stoan. Die hadden ze ien e loop van e joaren spoard, et pastte bij de winkel en et publiek von de blikken mooi.
Noa et sluten van e winkel kregen ze et idee om ien et pand n museum ien te richten. Ze wadden drie joar aan t verzoameln en verbouwen en konden ien 2009 et museum openen.
De eerste joaren was et wat improviseren en perberen, mor algedureg werd de ienrichting completer met passende toavels, stoelen en kleedjes en kwamen der meer en meer blikken en trommels te stoan.
Om b.v. koekjes, sukker, meel en andere woaren te bewoaren werden vroeger voak blikken moakt. Het blik werd onderdompeld ien tin zodat et niet roesten ging. Dan werd et ien n passende vörm drukt en mooi moakt met decoraties. Fabrikanten hadden al vlot deur dat et mooi reclamematerioal was en dus kwam de noam van e fabriek en et product op de blikken te stoan. De kopers bleken der oardegheid aan te hemmen en zo kwammen der aal meer specioale blikken op e markt veur verzoameloars. Host elke bakker had wel blikken met zien eigen noam en denk mor es aan de veule verschillende blikken van Droste sukkeloa.
Hein en Tineke strunende regelmoateg over rommelmarkten en ien tweedehandswinkels om te kieken of er wat aparts te koop was. Minsen die op vesite west wadden bij kennissen of femilie, kwammen sums loater melden dat ze één wisten, die de verzoameling wel kwiet wol. De Nauta’s stapende dan ien e auto en kwammen met n volle kattebak weerom. ‘Alles metnimmen!’, was voak de boodschap. Hein vertelt: ‘ Dat is voak wel de muite weerd! Natuurlek zitten der veul bekende en nije blikken tussen zo’n verzoameling, mor et is hum juust te doen om dat ene briljantje!’ Dat er veul briljantjes vonden worden, is ok helder, want zo langzoamerhand stoan er meer dan 7500 blikken, van groot tot klein, op e schappen.
Mor der is meer ze zien dan blik allinneg. Omdat et vroeger een winkel was, is er ok veul reclame materioal en winkelienrichting te zien. Natuurlek mag de teunbank en de kassa niet ontbreken. Een bijna complete waarkploats met hoamers, schoaven en zoagen kommen nog uut e femilie. De wasmachine met stampers, zieppoeier en olle waskniepers, kinnen zo weer ien gebruuk nommen worden.
Pakjes tabak, sigoarendeuzen, asbakken, aanstekers en rooktoaveltjes loaten mooi zien dat et vroeger de normoalste zoak van e wereld was om op n verjoardag een glas met rookwoar aan te bieden. Miniatuurtjes, tinnen figuurtjes en veul materioal over et ‘ Huis van Oranje’. Woar je ok kieken, elke keer weer verboazing en terugkieken ien e tied. Kinst et zo gek niet bedenken, of t is er!
Een poar keer ien e winterperiode komt er n vaste groep van 40 bezoekers noar Nijziel om gezelleg bij te proaten ien t museum. Een spreker vult dan n deel van e dag en men sluut òf met soep en brood.
Groepen, van bejoardensoos tot aan femiliedoagen, kommen op òfsproak noar t museum en kriegen dan eerst uutleg van Hein met kovvie/thee en museumgebak van Tineke. Met gemak brengt de groep de hiele middag tussen de oldheden deur.
t Museum is niet op vaste doagen open, dus je moeten eerst eefkes bellen (tel. 0594-212512) veur n òfsproak. Op biezundere doagen as: Tocht om de Noord en Open Monumentendag, stijt de deur wiedwoagen open. Mor kiek veur de zekerheid altied even op e website: https://www.blikentrommelmuseum.nl/ .
Hein en Tineke zillen jim met veul plezier ontvangen en n blik gunnen ien et museum.
Geert Zijlstra
Mientje: ‘Hij zee dat zunner blikken of blozen!‘