Gedichten

Afdrukken

Eilaand -- Lucie Pakes (2018)

Bij elke stap meer löskommen
van de vaste wal
met aal zien beslommeringen.
Aal meer spiensels
verwaaien met t striemende zaand
op bulten of gliesteren de golven ien
Enkel schuum blift over.
Niet meer omkieken.
gewoon metgoan ien de getieden,
stap veur stap.
Afdrukken

Pluuskes ien e wiend - Lucie Pakes

Woar ereguster
t laand nog saai,
altied groen leek
kreeg guster aal
n aander aanzien.
Veurzichteg blonken
gele steerntjes
tussen gras en ruut
zich koesend ien
de veurjoarszun.

En vandoag
dragt het t weiland
heur groen met
gele noppen
bezaaide feestjurk
dat hel oplicht
as zun en wiend
heur kleed beroert.

En mörgen,
zo de wiend t wil,
lotten duzenden
pluzebollen hun
hun noazoaten lös
om op goed geluk
del te komen
te oarden, om
vannijs t rad
ien beweging
te brengen

Afdrukken

Dreumen - Lucie Pakes

t Was ien jannewoari
en duvels kold ien t paark.
Zag ik dij toen doar niet lopen?
Doe kwamst van dien waark.
Wiedevoak es aan dij docht,
k zaag die zels aal ien mien dreumen
Ja, wat dee zo’n wichtje doar
allent Ien t paark te kleumen?

Zo verloren ien dijzelf,
leekst de tied vergeten.
Doelloos liepst doar ien de snij
een stuutje vot te eten.
Bij de viever bleefstoe stoan
wat eendjes zwommen ien n wak.
En t gebeurde veur  ik ‘t wist
Da’k zomor mien haand uutstak.

Ik zei: “ kiend schei uut met dat gekleum
ik wil dij wel waarmen.
Ik bin een dreumer, doe bist mien dreum
kom lekker ien mien armen.
Wat dij ok mag bezeghollen,
zo zwoar kin’t toch niet weden.
Aal dien zörgen dreum k veurbij,
dreum ik noar ’t verleden”

En wonder boven wonder
Is t toen gebeurd
Mien dreum van toen die is uutkommen
En het mien levem kleurt
t was ien jannewoari
Mor t veurjoar keek om t hoekje
Snij wer n rose bloesempraacht
Deur n wicht ien n spiekerbroekje

Afdrukken

Confetti - Lucie Pakes

Doar woar ik stoa
kiek ik net boven
de heeg uut.
Mestgeur komt
aanwaaien met
de waarme zudewiend

Bomen ien blad
mor de popelier
door ien de verte
vien k et allermooist
Teerder groen
van zukse hoge bomen
besteit niet

Binnen de omheining
van de olle heeg
door is’t stil
Nou, vogels
sjaanderen en
et wiendje ruzelt
deur old beukeblad

Geuren lewaaien niet,
of de bloesems
die met hannenvol
tegelieks zuk
uutstrooien lot:
n optocht van kleur
waaiert uut

Et floddert en vlucht,
et dwarrelt en de
heeg wordt behongen
met confetti.
Ok op et kerkhof
Viert et veurjoar feest

Westerketier ien beeld

T shirt bestellen