Gedichten

Afdrukken

Iendruk - Jan Blaauw

De störtregen is te keer goan

ien  e veur- en achtertuun.

Enter en twenter wordt mien pad

hinderd deur verwaaide bloemen.

De voeten en boksempiepen bennen

kleddernat ien n stuk of wat

sekonden. n Bamboetak slagt me

ien t gezicht. Noaktslakken

schuven defteg over t stroatje.

 

n Nije bui komt dichterbij.

Afdrukken

Schrieven (II) - Jan Blaauw

 

t Eigen ik zöcht n schiere stee

ien t gedicht, wil van dichtbij

zien woarover t gijt. De crisis

ligt veur t oppakken, Irak het

de slechtste tied had, veurman

Obama wordt grammiedeg 
over de banken, Grunnen wint.

t Eigen ik gijt van t ien op

t aner been stoan, verzet

de zinnen, zigt de vangst van

drugs ien t Capitool, de film die

‘Oorlogswinter’ hiet. De vrouw

dut n euro ien t kollektebuske,

schiert de tuun op woarien….

t Eigen ik viendt t  genoeg,

het lak aan e vörm, de regels,

stapt rezeluut uut t gedicht.

Laankt mij d’haand, wìnst

mij sterkte. Verbaldereerd

stoa k as Jan te zuken

noar de schrievers noam. 

Jan Blaauw

Afdrukken

Schrieven (I) - Jan Blaauw


SCHRIEVEN (I)

Ik kiek noar buten, t regent.

k Moak mien noagels schoon,

puul aan n stukje vel, pak

de telefoon as de ringtone klinkt.

Schrieven is der niet bij,

k doe niks as wachten,

voetbalploatjes ien e kop.

Nog twee, t schut al op.

Op e radio n koperkwintet,

n kop thee onner haandberiek,

kold. Pim de la Parra stoart

mij aan vanuut n’olle kraant.

Hiel even n stroaltje zun…

n Blauwmeeske fladdert tegen

de koamerruut, woar k’eerns

de wedstriedregels bestudeer.

Jan Blaauw
Afdrukken

SWET-4 - Jan Blaauw

Requiem veur twee bruggen brengt
ok zunder rolstoelen n bult mensen
bij mekoar, op e fiets of wandelnd,
de jazzen over d'aarm, nog warm zat.

De benoale boerenbruloft met e toart
van stro levert n schitternd lied op.
d'Acteurs runnen rond op e iesboan,
Anonymus ien sangen vragt: ‘Kovvie?'
Ik schud mien kop, kiek noar de lu
ien e partytent, veur driekwart volstopt.

t Is ienienen stil, de trouwdag wordt
tot kolle doodgoandag ombatterijd.
De kiekers kommen langzoam ien t èn
as de muzikant de moat slagt op zien
omfloerste trom. Bij t kenoal aanland
is t n verdrietege toestand, veul licht
en madrigoalen, groot orkest, sirenen
die aan e spoorbrug hangen. De plons
ien t kolle wotter van e brudegom dut
zien vrouw vliegen, wij lopen apmoal.

Ik kan niet vliegen! Deurdringend
klinkt de stem van e hoofdrolspeulster
over t kenoalwotter, hangend aan e
kroan. Ik kán niet, toch vliegt ze.
Maank jongelu en oldere kiekers
schuuf ik noar de kunstege loopbrug
die Zuud wiebelnd met Noord verbindt,
aanpeerdjed deur dreunende meziek.

Aan d'overkaant kieken we nijsgiereg
noar de lichtstroalde boodschap die
dudelk moakt dat t doan is, de vuurpiel
knalt as n rood uutroepteken ien e lucht.


Afdrukken

De Schriefwedstried - Jan Blaauw

De woorden die aans vlot uut de pen rollen,
loaten me schoamachteg ien e steek. Met
ofhangende scholders, d’elleboog op de toavel,
de haand onner de kin, vollen op t gezicht,
wacht ik op d’ienspiroatsie die schienboarliek
n vrije dag nomen het. Ik maggel doedels
op e raand van t schriefblok, zie n kerk maank
t greun dat versloddert, n vliegtuug oarzelnd
ien e lucht, twee treinen die mekoar veurbij
roazen, tied en tiedgeest, niet begriepend.

t Bovenstuk van e pen is niet zo lekker
as t liekt. Mien ogen stoaren woazeg
noar n kerk woar gien mens n voet zet,
lözze stenen ien rekloametied aanboden
worden veur 10 euro t stuk, de bomen
op n kapvergunning wachten, t vliegtuug
met veul gebeer land is op n ploatje
ien t Dagblad, de treinen barstendevol
over enkel spoor noar de toekomst online
jakkern met staarke wenst noar ienvoud.

Westerketier ien beeld

T shirt bestellen