Lees van alles over onze Toal

Afdrukken

Winnend gedicht van Are Meijer




OPEN PODIUM
 
de koamer vulde hum met moagere bezoekers
ze schudden mekoars handen vulden gloazen lachten
luud deden heur tegoed aan wat er laag
hoogopstoapelde zinnen zinnestrelend fruit
 
as hadden ze ok ien joaren niet eten niet
dronken was dit heur allerleste
kaans ze likkeboarden lulden lalden
vergrepen heur aan mekoar ien n liederleke daans
 
de kreten van vertellers doolden rond
as animeermeiskes met deurlopen ogen
een dichter piste van e hoge
de gastheer sloeg de handen veur zien mond
 
de stroom viel uut en dat werd vierd met draank
hier werden woorden van heur toak ontheven
de flessen leeg de geest het lege leven
twee zielen vielen zingendeweg uut vensterbaank