Noadat Bert Weggemans zien eerste Nederlandstoalege dichtbundel ‘De mens uit het beest halen’ verscheen ien oktober 2021 vond hij dat et hoog tied werd veur zien eerste bundel ien t Westerkwartiers. Over de titel huufde Bert niet laang noa te denken. ‘A-der één plak is woar ik mij ien al die joaren op mien gemak vuulde dan was dat t plakje bij t gemoal aan t Olle Diep’.Doar, bij t Sluuske wadden eileks onder et vissen stilswiegend al heul wat gedichten ien zien heufd ontstoan. De gedichten goan veur n belangriek deel over plakjes ien t Westerkwartier, de aandere gedichten hemmen algemene thema’s die er ien e streektoal verwoord het. Om de bundel veur de lezers overzichtelek te moaken binnen de 43 gedichten iendeeld ien vier hoofdstukjes: Woater, Tied, Swiegen en Liefde.
Bert: As ik mien vrouw en kiender leuven mag zitten der hiele mooie gedichten bij, n aantal kleinere gedichten omschrieven ze as ‘sieroadjes’ of ‘juweeltjes’. Ik hoop dat mien lezers ien t Westerkwartier dat ook vienden. t Omslag is van t boekje is n schilderij van mijzulf van de omgeving van t Sluuske. Aankommen zummer woon ik negenenderteg joar met mien vrouw ien Nijbert. Laang genog om mezulf Westerkwartierder te vulen. Ik woon hier dan al twee moal zo laang as ien mien geboortedörp Roswinkel ien Zuud-Oost Drenthe.
Poëzie het altied al mien ienteresse had, mor deur mien drokke wark kwam ik der eileks nooit aan toe. Dat veranderde ien 2010 toen ik vanwege gezondheidsredenen mien wark as docent Engels niet meer doen kon. Tiedens mien herstel bin ik vanzulf gedichten goan schrieven. Allereerst over t herstel en over de therapieën die ik volgde. Mien begeleiders vonden de gedichten weerdevol en hemmen mij aanmoedigd om der met deur te goan.
Stoareg aan begon ik ok meer poëzie van aandere dichters te lezen, en moek ik kennis met de Stichting Mien Westerkwartier. Mien eerste Westerkwartierder schriefwedstried leidde mij noar Zuudhörn woar de priesuutreiking holden werd. Doar leerder ik verschillende Westerkwartierder schrievers en dichters kennen, onder andere Reinder Willem Hiemstra, woar ik de uutgoave Moest heuren aan te danken heb.
Zo roakte ik geleidelk aan vertrouwd met de Westerkwartierders en heur toal. Want doar had ik de eerste zeuvenentwinteg joar nooit tied veur had. De toal begon mij meer eigen te worden, en noadat ik ien 2011 de cursus Schrieven ien t Westerkwartiers volgd had bij Tonko Ufkes en Alie de Vries ien e Vrijborg ien Nuus is t echte schrieven begonnen. Ien 2012 beloonde de jury van de Pervinzioale Schriefwedstried mien gedicht ‘Sporen van e winter’ met de eerste pries ien e categorie Poëzie.
Dat was n mooie stimulans om der met deur te goan, en goandeweg kwam ik ien contact met Melle Hijlkema, Klaas Duursma, Willem Tjebbe Oostenbrink , Egge Wieringa en Coby Poelman.
De poëzie zowel ien t Nederlands as ien e streektoal van t Westerkwartier werd mien belangriekste dag-ienvulling. Heul veul poëzie lezen en ok weer meer zulf schrieven.
