Op 1 oktober is de bundel ‘Sluuske aan t olle diep’ van dichter Bert Weggemans prizzenteerd ien e Coendersbörg ien Nuus. Ruum 70 bezoekers kwammen op dizze middag of en genoten van n ofwisselend programma met muziek en gedichten. Alie de Vries proatte de boel aan mekoar.
Piet Buist en Geert Zijlstra trappende of met verskes ien t Westerketiers, woarnoa Bert een aantal gedichten uut zien bundel veurdroeg. Doarna kwammen zien collega’s Tonko Ufkes en Melle Hylkema.
Ien e pauze kon elk die dat wol, een gesigneerde bundel van Bert kopen, doar is goed gebruuk van moakt. Noa de pauze nam Gert Sennema de muziek veur zien rekening en droegen Bert en Melle vannijs veur. Aan t enne van e middag bedankten Alie en Bert et aanwezege publiek, dat dudelek genoten had.
