Berend en Hetty hadden flink succes met hun buuten Fitness-programma. Drie, vier keer ien e week stonden ze met hun FoodTruck op een sportieve plek en noa t nijs van een poar week leden ston nou ok t Arjen Robben Court ien Bedum op t program. Die locatie liep t allerbest, want Hetty nam t publiek met deur Bedum en vertelde over Arjen’s jeugd en voetbaloaventuren. Berend was zo loos west om drekst wat extra nummer 10 shirtjes te kopen en veur trouwe klanten kon hij ze nou nog leveren. Mooie handel. Ok de verantwoorde RobbenBurger, serveert op n bordje met zeerob-oafbeelding was n groot succes.
Mor der mos meer weeden en doarom wadden de jonge ondernemers op zuuk goan noar evenementen woar ze met de FoodTruck noar toe goan konden. t Aanbod van festivals, braderien en wielerkoersen was nog niet spektaculair, mor der wadden wel een hiel nust toeristen ien ons mooie Grunnen. En der is gien loser volk dan minsen, dus had Hetty n aantal campings opbelt met de vroag of ze doar niet n middag stoan mochten en dan n simpel fittness programma veur kids en een leerzoame wandeling veur de ouderen mochten uutvoeren.
‘U kunt het zo opnemen in uw activiteitenschema en u hebt er verder geen omkijken of kosten aan’.
Een poar campingondernemers, de miesten wadden ok verrast deur t aantal bezuukers, hadden doar wel oren noa, dus nou stonden zie nou voak ien de middag voak op n camping.
Die middag stonden ze bij een camping nabij Opende. Berend was al aan t bewegen sloagen met e jeugd en Hetty was met heur groepke wandeloars, via mooie padjes via de Leidiek richting et Curringheveld en buurtschap de Snipperij lopen. Ieneens zaggen ze aan de Polmaloan n dikke keisteen leggen met n bordje met tekst:
‘Wanneer je geest gaat zwerven met de wind, doe je, alleen en onbewaakt, anderen en dus ook jezelf kwaad’.
t Groepke stijt te delibereren wat dit wel niet is, as er grieze man met n board aanfietsen komt. Hij remt en stapt oaf.
‘Jim bennen zeker benijd wat hier gebeurd is?’
Hij zet zien fiets tegen t landhek, wiest et laand ien en begunt te vertellen.
Eefkes verderop ien t laand, dizze weg hiette toen nog de Rötteloan’ ston ooit t huuske van IJe Wijkstra, de man de berucht werd ien Nederland omdat er ien 1929 vier veldwachters doodschoot. En dat was hiel apart want IJe was hielemoal gien vremde of gewelddoadige gast. Ja hij mog wel groag en bietje joagen en streupen en had net as menig Westerketierder een hekel aan gezag, mor hij was veural ok een gewaarderde accordeonist op bruiloften en partijen en goed veur zien olde moeke en zien buren.
As muzikant kreeg er kennis met een familie die een grammofoon had. Oavenden laang luusterden ze noar ploaten en perbeerden ze de verskes noa te speulen op de accordeon.
Mor toen de man van die familie een pooske noar Veenhuizen mos, omdat er n poar pieken sloten had, klopte de vrouw Aaltje aan bij IJe, ze zocht waark en onderdak.
Heur 6 kiender had ze ien e steek loaten, want ze hoopte dat die dan deur de armenzörg verzörgd worden zollen. Ze was ja immers zo aarm as Job en kon de kiender niet eens genog eten geven.
De rechters ien Stad kregen der lucht van, dat ze t spul verloaten had en wollen heur tot de orde roepen. Ze mos noar Stad kommen om zich te verantwoorden, mor dat duurde ze niet, doodsbenauwd dat ze oppakt worden zol en et Westerkwartierder nooit weer zol zien.
t Mos toch en doarom stuurde de burgemeester van Grootegast vroeg ien de ochtend van 18 jannewoarie 4 veldwachters noar de Snipperij om Aaltje op te hoalen. Ze klopten aan e deur en wat er toen krekt gebeurde ien de kop van IJe wiet gieneen, mor die pakte zien karabijn en niet veul loater laggen er 4 dooie veldwachters ien de snij aan de Rotteloan. Vandoar dizze kei hier ien de baarm.
De wandelaars keken de verteller verwonderd aan en Hetty bedankte de man hartelijk veur zien verhoal.
‘Kom zo maar even naar de camping voor een kopje koffie als dank’.
Doar heb ik nou gien tied veur doame, mor kom rusteg een moal weer en bel me dan op, dan loat ik dij zien woar t huuske van die vraauw Aaltje ston.
Hij gaf Hetty n oranje koartje met zie noam en tillefoonnummer en de tekst ‘Kom Op Verhoal’.
Toen ze weer bij Berend bij de Foodtruck kwam, vertelde ze wat heur overkommen was.
‘Dan moeten we hier voaker noar toe, der zitten nog veul meer verhoalen ien et Westerkwartier’.