Op zotterdagmörn 6 juli wordt de nije verhoalenbundel van Tonko Ufkes prizzenteerd ien Linde, n lut dörpke bij Zuidwolde (Dr.). De bundel hiet: ‘Doagen en dreumdoagen’ en is uutgeven deur Het Drentse Boek – doarom is de prizzentoatsie niet argens ien t Westerketier mor ien Zuud-Drenthe.
Der stoan 33 nije verhoalen ien de bundel en Tonko zeit doar zulf over: De verhoalen ien ‘Doagen en dreumdoagen’ bennen aalmoal as lösse verhoalen schreven en doarnoa deur redakteur Roelie Koobs uutzöcht, sekuur bekeken en op volgorde zet. Alle verhoalen stoan hiel dicht bij mij, mor ze goan niet over mij mor over n schoakspeuler, n tekenoar, n fotogroaf, n pianiste uut Iran, n olde man uut Griepskerk, n schooljonge, n olde vraauw uut Noordloaren, n vekaansieganger ien Noorwegen enz.
Voak goan de verhoalen over gewone mensen die ieneent wat metmoaken; wat belaangrieks of wat vremds. En meesttied lopt et ien t lest goed òf. En sums ok niet. De bundel ‘Doagen en dreumdoagen’ is Tonko’s daarde verhoalenbundel die bij Het Drentse Boek verschient, t boek is bij de boekhandel te koop en vanzulf ok bij de schriever.
Nije verhoalenbundel van Tonko Ufkes
