ik brocht dij vot en moek mezelf wies dat ik wis woarhen
wat lijt-er achter hobbels ien e weg, veurbij de verre bossen?
s mörregens goan we op vier bienen, s oavmts op drie
ien t lest worden ons de poten onner t lief uut schopt
en ok die aaltied neus ien e wiend harren
leggen dan met e neus omhoog
ik brocht dij vot, we keken deur matgloazen deuren
woarachter voale jassen daansden
vertroagd ien e tied
die as de snert van dien moeke over onze schoenen glee
eenmoal buten kroop n adder veur ons uut
en wees ons t pad noar n deur ien e grond
Met dit gedicht won Are Meijer ien 2023 de pried Nedersaksich op het Poëziefestival Gelselaar.
Foto: Jan Glas